पुस २३, २०७२- कोपा डेल रेको गएराति भएको खेलमा इस्पानियलमाथि बार्सिलोना ४–१ ले विजयी भएको छ । १ गोलले पछि परेको बार्सिलोनालाई खेलमा फर्काउन लियोनल मेसीले २ गोल गरे भने थप २ गोलको अवसर सिर्जना गरिदिए ।
बार्सिलोनाको लागि अन्य गोल पिके र नेयमरले गरेका थिए । खेलको ९ औं मिनेटमा काइसेडोको गोलबाट अग्रता लिएको इस्पानियलका २ खेलाडी रातो कार्ड खाएर बाहिरिएपछि ९ खेलाडीमा सीमित भएको थियो ।
खेलको १३ औं मिनेटमा मेसीले इस्पानियलको अग्रता बराबरीमा ल्याए । मेसीले ४४ औं मिनेटमा २५ यार्ड टाढाबाट हानेको फ्रि किक गोलमा परिणत भएपछि बार्सिलोनाले खेलमा अग्रता लिएको थियो ।
दोस्रो हाफको सुरुवातमै मेसीको क्रसमा पिकेले गोल गरे । ८८ औं मिनेटमा मेसीले दिएको भली पासमा नेयमारले गोल गरेका थिए ।
यसैगरी, गएराति भएको लिग कपको सेमीफाइनल म्यान्चेष्टर सिटीलाई इभर्टनले २–१ ले हराएको छ ।
विजेता टोलीका लागि मोरी र लुकाकुले क्रमश: ४५ र ७८ औं मिनेटमा गोल गरेका थिए । म्यान्चेष्टर सिटीको लागि ७६ औं मिनेटमा जेसस नाभासले गोल गरे ।
