पुस २१, २०७२- अंग्रेजी नयाँ वर्षको छेकोमा तीन नायिकाका गीत आए । प्रियंका कार्कीको ‘स्वतन्त्र’ देखि छुल्ठिम डोल्मा गुरुङको ‘खसेका तारा’ र पूजा शर्माको ‘प्रेमकथा’ यतिबेला चर्चामा छन् । सोही मेसोमा मंगलबार नायिका रेखा थापाले पनि नयाँ गीत रेकर्ड गराइन् ।
फ्लोरमा जाने क्रममा रहेको फिल्म ‘लालजोडी’ को ‘मा कसम…’ बोलको गीतमा रेखाले आइतबार प्रल्हाद तिमिल्सिनासँग युगल रुपमा रेकर्ड गराईन् ।
क्लासिकल फ्लेवरमा रोमान्टिक भनिएको गीतको संगीत थानेश्वर गौतमले दिएका हुन् । थानेश्वरलाई रेखाले नै फिल्म ‘रामप्यारी’ बाट ब्रेक दिएकी हुन् ।
‘यो गीत अलि हाइ स्केलको भएकोले गाह्रो लागिरहेको थियो’ पुतलीसडकस्थित आवर्स स्टुडियोमा गीत रेकर्ड गर्ने क्रममा रेखाले भनिन्, ‘तर पर्याप्त रियाजपछि भने ठिकै भएको छ ।’ उता प्रल्हादले भने आफूलाई नै हाइ स्केलमा गाह्रो भइरहेका बेला नायिकाले भने सहज गाएको देख्दा आश्चर्य लागेको बताए ।
गीत फिल्मकै निर्देशक समेत रहेका लक्ष्मण सुवेदीले लेखेका हुन् ।
रेखाले यसअघि वर्षात् फिल्ममा शंकर विसीसँग गीत गाएकी थिइन् । त्यसअघि उनले बालगीत पनि गाएकी थिइन् ।
