राष्ट्रिय गीत : पश्चिम कोही पूर्व घर

~गोपाल योन्जन~

पश्चिम कोही पूर्व घर
आँगन तर एउटै हो
छरिएर बसे के भो
सन्तान त एउटै हो

कर्णाली, महाकाली, कोशी कँही बागमती
हिमालकै जलधारा एउटैको छ नाम कति
चाखी हेर हर खोली, पानी सब एउटै हो
छरिएर बसे के भो, सन्तान त एउटै हो

गुराँस, सुनाखरी, कही फूल छ अजम्बरी
सृष्टिकै सुन्दर फूल तर नाम थरी थरी
सुवास र रङ अनेक फूलबारी त एउटै हो
छरिएर बसे के भो सन्तान त एउटै हो

स्वर / शब्द /संगीत : गोपाल योन्जन